ក្រសួងសាធារណការ និងដឹកជញ្ជូន បើកវគ្គបណ្ដុះបណ្ដាលបច្ចេកទេសសម្រាប់គម្រោងធ្វើឱ្យប្រសើរឡើងវិញផ្លូវជាតិលេខ២ និងផ្លូវជាតិលេខ២២ ដល់មន្ត្រីវិស្វករវ័យក្មេង ដើម្បីបំពាក់បំប៉នចំណេះដឹងថ្មីៗក្នុងការចុះសម្របសម្រួល និងពិនិត្យលក្ខណៈបច្ចេកទេស
29-April-2020 | ដោយ ពលមនសិការ
ភ្នំពេញ៖ នៅថ្ងៃពុធ ៨កើត ខែពិសាខ ឆ្នាំជូត ទោស័ក ព.ស.២៥៦៣ ត្រូវនឹងថ្ងៃទី២៩ ខែមេសា ឆ្នាំ២០២០ នៅ ទីស្ដីការក្រសួង ឯកឧត្ដម តូច ចាន់កុសល រដ្ឋលេខាធិការប្រចាំការ នៃក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាលបច្ចេកទេសសម្រាប់គម្រោងធ្វើឱ្យប្រសើរឡើងវិញផ្លូវជាតិលេខ២ និងផ្លូវជាតិលេខ២២ ដល់មន្ត្រីវិស្វករវ័យក្មេងប្រមាណ១០រូប របស់ក្រសួងដែល ទទួលភារកិច្ចចុះសម្របសម្រួល និងពិនិត្យលក្ខណៈបច្ចេកទេសលើគម្រោងនេះ។
វគ្គបណ្ដុះបណ្ដាលនេះរៀបចំឡើងក្នុងគោលបំណងបំពាក់បំប៉នចំណេះដឹងថ្មីៗបន្ថែមទៀតដល់មន្ត្រីទាំងនោះ តាមរយៈការផ្តល់បទបង្ហាញពីវាគ្មិនអន្តរជាតិដែលមានបទពិសោធន៍យូរឆ្នាំ ជាវេទិកាសម្រាប់ការសួរដេញដោលនូវរាល់ចម្ងល់ទាំងឡាយដែលធ្លាប់បានជួបប្រទះ ខណៈពេលអនុវត្តជាក់ស្ដែងសំដៅធានាបាននូវទំនុកចិត្តខ្ពស់ក្នុងការអនុវត្តការងារប្រចាំថ្ងៃ។
ថ្លែងក្នុងសុន្ទរកថាបើកវគ្គបណ្ដុះបណ្ដាលនាពេលនោះ ឯកឧត្ដមរដ្ឋលេខាធិការប្រចាំការបានជម្រាបជូនសិក្ខាកាមអំពីប្រវត្តិសង្ខេបរបស់គម្រោងឱ្យសិក្ខាកាមជ្រាបដូចជា៖ នីតិវិធីដេញថ្លៃក្រុមហ៊ុនម៉ៅការ ក្រុមហ៊ុនប្រឹក្សាបច្ចេកទេស និងការដោះស្រាយផលប៉ះពាល់រហូតដល់គម្រោងមួយចាប់ផ្ដើមដំណើរការជាផ្លូវការ។
ឯកឧត្ដមរដ្ឋលេខាធិការប្រចាំការបានបន្តថា៖ គម្រោងមួយមានដំណើរការល្អ ឬមិនល្អ មិនមែនអាស្រ័យលើក្រុមហ៊ុនម៉ៅការតែប៉ុណ្ណោះទេ ប៉ុន្តែវាអាស្រ័យលើម្ចាស់គម្រោង (អង្គភាពគ្រប់គ្រង និងអង្គភាពអនុវត្តគម្រោង) និងក្រុមហ៊ុនប្រឹក្សាបច្ចេកទេស ដែលជាកត្តាដ៏សំខាន់ក្នុងការសម្របសម្រួល និងសហការជាមួយក្រុមហ៊ុនម៉ៅការយ៉ាងជិតស្និទ្ធ ដើម្បីឱ្យគម្រោងមានដំណើររលូន និងមានគុណភាពខ្ពស់។
ជាមួយគ្នានេះផងដែរ ឯកឧត្ដមរដ្ឋលេខាធិការប្រចាំការសង្ឃឹមយ៉ាងមុតមាំថា៖ វគ្គបណ្ដុះបណ្ដាលនេះនឹងផ្ដល់ចំណេះដឹងដ៏មានតម្លៃក្នុងការលើកកម្ពស់សមត្ថភាពវិជ្ជាជីវៈរបស់មន្ត្រីវិស្វករ ដែលជាសសរស្ដម្ភ និងជាទំពាំងស្នងឫស្សីប្រកបដោយសក្ដានុពលរបស់ប្រទេសជាតិ។
ឯកឧត្ដមរដ្ឋលេខាធិការប្រចាំការបានផ្ដាំផ្ញើឱ្យសិក្ខាកាមទាំងអស់យកចិត្តទុកដាក់ត្រងត្រាប់ស្ដាប់ការពន្យល់ពីអ្នកជំនាញ ព្រមទាំងលើកទឹកចិត្តឱ្យចូលរួមជាមតិយោបល់ សួរដេញដោលឱ្យបានផុលផុស ដើម្បីស្រាយចម្ងល់សំដៅទទួលបានចំណេះដឹងជាក់លាក់ ដើម្បីបម្រើនិងអភិវឌ្ឍប្រទេសជាតិរបស់យើង ៕
ចំនួនអ្នកទស្សនា
- ថ្ងៃនេះ4241
- ម្សិលមិញ4561
- សប្តាហ៍នេះ21841
- ខែនេះ14961
- ឆ្នាំនេះ351221
- សរុប19578667